Get Adobe Flash player

Ahustacion di maneho pa extension di estadia turistico

 

Entrante mayan 15 di september 2015 Minister di Integracion ta introduci algun ahustacion den su maneho di extension di estadia turistico pa en particular e categoria di turista cu ta bin Aruba pa permanece na cas di famia.

 

Lo reintroduci e procedura di "control di referente" y den e cuadro di esaki a modifica entre otro tambe e formulario di aplicacion di extension di estadia turistico cual ta obtenibel riba www.dimasaruba.com.

 

Kico e procedura di "control di referente" ta ensera?

Te cu awor e garante mester a haci un declaracion cu e tin un cierto entrada y despues su persona ta laga legalisa su firma. Esaki awor ta cambia.

 

1. No ta rekeri pa legalisa firma di e garante mas na DWJZ ora di tramita extension di e estadia turistico pasobra cu a incorpora e parti aki riba e mes formulario di aplicacion pa extension di estadia turistico cual awor mester ser firma na DIMAS;

2.E garante no solamente mester declara, pero tambe mester por comproba cu e ta gana suficiente pa luna pa por para responsabel pa tur gastonan di e turista;

3.E garante mester duna adicional autorisacion na DIMAS pa por efectua control di vivienda di garante;

4. E garante mester motiva y sostene e rason pakico e ta solicita pa un extension di e estadia turistico pa mas di 30 dia

5. E garante y e turista mester tin un "record clean", locual ta ensera entre otro cu no  a viola condicionnan relata na estadia den bishitanan previo;

 

Ki ta entrada minimo cu e garante mester tin?

Entrante 1 di juni 2015 a stipula un suma di entrada nobo pa por para garantia ora di kier aplica pa un estadia of extension di e estadia turistico.
E suma di entrada necesario ta acopla na e suma pa un persona por sobrevivi na Aruba segun analysis di Oficina Central di Estadistica (CBS) aña 2014.
E entrada mensual di Afl. 2040,= pa luna ta necesario p’e garante cu tin intencion di para responsabel pa uno (1) te cu tres (3) turista por permanece na su cas.
Si e garante tin intencion di para garantia pa mas cu tres (3) turista permanece na su cas, e suma di entrada minimo ta  stipula na  Afl. 4.080,= pa luna.

 

Kico ta e responsabilidadnan di un persona cu ta para como garante?

Un garante mester ta conciente cu e ta esun ta asumi full responsabilidad pa eventual gastonan incuri pa e turista durante su estadia turistico y tambe despues si no bandona Aruba dentro di e tempo cu a otorga na dje, entre otro cu:
- Un garante ta responsabel pa duna alohamento na su cas durante e estadia turistico;
- Un garante ta para responsabel pa gastonan di mantencion (cuminda, bebida) di e turista cu permanece na su cas;
- Un garante ta responsabel pa  gastonan extra cu e seguro medico of di accidente no ta cubri;
- Un garante ta  responsabel pa e turista te na e momento cu e turista bandona Aruba;
- Un garante ta responsabel pa tur e gastonan cu tin ora di mester sera un persona den retencion di stranhero (vreemdelingenbewaring)
- Un garante ta responsabel  pa e gastonan di deportacion di un turista cu a viola e condicionnan di su estadia (por ehempel a ser encontra ta traha)
- E garante ta keda responsabel pa percura pa e persona bandona Aruba dentro e tempo otorga pa e instancia(nan) migratorio.

 

Un garante cu no a cumpli  cu su responsabilidadnan como garante ta wordo "marca"  y  elo tin consequencia p'e ora cu e tin intencion pa para garante pa otro turista(nan) bin keda mas na su cas.

 

Procedura pa extension di estadia turistico (na cas di famia)

Un turista por haya na su yegada na migracion por  un estadia turistico di 30 dia maximo y esaki ta resulta den gran mayoria di caso di ta mas cu suficiente.
Si e turista tin intencion di keda mas cu su termino stipula dor di migracion di Aruba (te na un maximo di 90 dia pa entrada), elo mester aplica pa extende su estadia turistico na oficina di DIMAS.
E peticion aki mester ta entrega na tempo, esta prome cu e tempo duna dor di migracion vence. Ta consehabel pa haci un peticion por lo menos un siman prome cu e fecha di estadia vence.
Un extension di estadia turistico bou di e garante lo por ser duna si ta cumpli cu e rekisitonan nobo aplicabel  pa cu esaki y si por comproba cu den pasado tambe a percura pa a cumpli cu tur obligacion y condicionnan stipula tanto como garante como pa e turista.

 

Kico DIMAS ta rekeri di e turista cu ta keda na cas di famia y di su garante ora di tramita un peticion pa extension di e estadia turistico?

- Formulario (nobo) di solicitud yena segun berdad, obtenibel riba e website di DIMAS www.dimasaruba.com
- Copia di paspoort di e turista cu un valides di por lo menos 3 luna despues di fecha di entrada (ta rekeri copia di tur pagina cu stempel y visa);
- Copia di un pasashi valido cu fecha di regreso nobo;
- Copia di seguro di biahe cu ta cubri gastonan medico y di accidente of seguro priva cu ta cubri gastonan medico y di accidente (ziektekosten en ongevallenverzekering). E seguro mester ta valido pa e temporada cu e turista kier sigui keda na Aruba.
- E declaracion di garantia yena riba e formulario di aplicacion y ta ser firma dilanti di e funcionario publico di DIMAS;
- Formulario di declaracion di entrada(nan) yena y acompaña pa cu su comprobante(nan);
- Formulario di autorisacion yena unda ta bai di acuerdo pa efectua control di cas;
- Copia di ID di e garante cu un valides di por lo menos cu 3 luna;
- Declaracion di Censo di Awg.5,= di garante;
- Splicacion di e motibo(nan) a base di cual ta aplica pa un extension di e estadia turistico acompaña pa tur documentacion relevante (declaracion di dunador di trabou, carta medico, of otro) pa sostene esaki;

 

Tanto esnan cu ta para garante como e turista mester ta presente na momento cu bin DIMAS pa solicita pa un extension di e estadia di turista pa por permanece na cas di famia

 

Cual ta e orario pa entrega peticion pa un extension di estadia turistico?

Orario pa tuma un number pa e servicio pa haci un peticion pa extension di estadia turistico ta:

Di Dialuna te cu diahuebs di 7:30-11:00 am y 13:00- 3:30 pm

Diabierna di 7:30-11:00 am

Tur hende ta yega na beurt y ta wordo atendi segun orden di yegada.

 

DIMAS ta pidi tur su clientenan pa tene bon cuenta cu e cambionan aki riba menciona. Pa mas informacion tocante (e cambio di) maneho pa estadia di turista, e proceso pa aplicacion y kico pa haci ora no ta di acuerdo cu un decision tuma,  por bishita nos website www.dimasaruba.com of por yama den oranan di oficina via nos central 522-1500.

 

zoeken