ORANJESTAD – DIMAS ta informa tur su clientenan y partners cu entrante dia 15 di januari 2020 lo introduci un otro procedura transitorio pa locual ta trata e orden y forma con clientenan di DIMAS lo tin di cumpli cu nan pago pa productonan di DIMAS.
DIMAS ta innovando y ta den un fase di transicion pa cu e manera con lo ofrece su servicionnan y productonan. Den curso di e promer parti di aña 2020 DIMAS ta bay introduci gradualmente e posibilidad pa su clientenan haci peticionnan online. Publico lo wordo introduci na e portal nobo di DIMAS, cu tur su beneficionan na su debido tempo.
E cambionan mas importante na e momentonan aki pa cliente di DIMAS ta lo siguiente:
Cliente di DIMAS lo por haci su pago di DIMAS solamente cu un “Betalingsopdracht”, esaki ta un orden di pago digital cu DIMAS ta emiti.
E “Betalingsopdracht” ta inclui
– e datos personal di e cliente di DIMAS,
– su number di cliente (CRV), y tambe
– tin un barcode y ta inclui un serie di number (= number di e orden di pago).
Con e procedura transitorio di cancelacion di pagonan di DIMAS lo ta entrante di 15 di januari 2020?
- Cliente di DIMAS mester traha nan cita online riba nos website pa bin haci su aplicacion.
- Dia di e cita, e cliente di DIMAS ta presenta na DIMAS, pa haci entrega di su peticion pa e producto di DIMAS (sea cu ta un permiso di estadia of un declaracion di constancia of ta otro) y e cliente di DIMAS ta alabes entrega tur documento cu ta indica cu ta necesario pa por evalua e peticion pa e producto pidi.
- DIMAS lo emiti na e momento ey un “Betalingsopdracht” na e cliente di DIMAS specificando e suma(nan) cu mester paga, mediante su email adres personal. Ta hopi importante pa e cliente di DIMAS tin su email adres personal corecto y accesibel.
- Cliente di DIMAS por procede pa haci e pagonan indica riba e “Betalingsopdracht” sea via
* Billpayment di Aruba Bank
* Billpayment di Banco di Caribe of
* na un di e oficinanan di DIMP ubica na e MFA-nan unda por paga cu debit card (swipe) solamente.
- Cliente di DIMAS cu a haci nan pago online of na un MFA cu nan “Betalingsopdracht” dentro maximo 7 dia calendario, no mester presenta un biaha mas na DIMAS pa demostra e comprobante di pago. DIMAS mes lo ricibi un notificacion automatico di e pago realisa pa e cliente di DIMAS y lo percura pa e proceso di evaluacion di e peticion lo sigui cana
- Cliente di DIMAS cu no percura pa cancela e pago indica riba e “Betalingsopdracht” dentro di e periodo di maximo 7 dia calendario, lo ricibi un notificacion di e cancelacion/anulacion di e peticion.
En corto e cambionan cu lo bin na vigor desde 15 di januari 2020 ta lo siguiente:
| Antes, te cu 14 di januari 2020 | Entrante 15 di januari 2020 |
| Cliente ta haci su pago di permiso na Departamento di Impuesto y ricibi un stempel prome cu acudi e cita pa entrega su documentonan na DIMAS | E cliente ta acudi na DIMAS dia di su cita. Durante di e cita na DIMAS e cliente ta ricibi un “Betalingsopdracht”, via e emailadres cu e provee DIMAS, pa asina e por haci e pagonan. |
| E pagonan ta wordo haci na Departamento di Impuesto of na e booth di Departamento di Impuesto den e edificio di DIMAS | Despues cu e cliente ricibi su “Betalingsopdracht” e por scohe pa haci e pago sea via e opcion di:
· Billpayment di Aruba Bank of Banco di Caribe · of por pasa na cualkier MFA y cumpli cu su pago via di e mashin di swipe. |
Departamento di Integracion, Maneho y Admision di Stranhero ta pidi tur cliente encarecidamente pa tene cuenta cu e cambio transitorio menciona aki riba. Den caso cu tin cualkier pregunta por tuma contacto libremente cu DIMAS via di nos pagina di Facebook of e contactformulier riba nos website www.dimasaruba.aw.
