Header image

Consecuencia di peticionnan incompleto entrega na DIMAS

Actualmente DIMAS ta ricibiendo un cantidad di peticion cu ta drenta tur dia, mayoria di esakinan ta sosode online via di e e-form cu DIMAS ta usando pa ricibi dicho peticionnan.

Un di e retonan di mas grandi cu nos ta encontra como organisacion na e momentonan aki ta di clientenan cu ta entrega un peticion incompleto. Nos ta encontra dos tipo di peticionnan incompleto:

  1. Peticionnan online unda cu e cliente no ta agrega niun documento na e e-form.
  2. Peticionnan caminda cu e cliente falta 1 of mas documento.

A reduci e documentonan riba e lista(nan) di rekisitonan

Den e ultimo aῆa DIMAS – conhuntamente cu otro departamentonan di gobierno – a yega na palabracionnan pa cu intercambio di informacion y uzo di medionan tecnologico pa por acesa of haya informacion relevante.

Esaki a resulta den e hecho cu DIMAS a reduci e cantidad di documentonan cu e ta pidiendo pa por trata un peticion considerablemente. Na su lugar e ta unicamente pidi e cliente pa dun’e e autorizacion (via di e E-forms), pa e como organizacion por procede consulta informacion relevante pa e evaluacion di e peticion.

Importancia di entrega un peticion completo

E ta hopi importante pa tur cliente  sigura nan mes cu nan ta entrega nan peticion completo.

Un peticion completo ta facilita  e proceso di e evaluacion di e peticion y lo haci cu e peticion lo por cana mas eficaz.

Un peticion completo ta significa cu e cliente ta:

  • Ta yena e tur e veldnan di e formulario cu ta relevante pa e sorto di peticion cu e ta entrega.
  • Ta entrega tur e documentonan rekeri pa su tipo di peticion segun e checklist corespondiente.

Kico ta pasa si entrega un peticion incompleto?

Te cu na comienso di e pandemia DIMAS tawata acepta peticionnan incompleto, pero tawata ser teni un banda pa un tempo defini te ora cu e cliente entrega e documentonan cu ta haci falta pa asina completa su peticion y e por sigui cu e proceso.

Den hopi caso esaki no a logra dentro di e termino duna pa coregi e falta, cu consecuencia cu DIMAS a keda cu un cantidad di peticion “on hold” cu no por a sigui su proceso y DIMAS haya su mes obliga na culmina e peticion cu por a resulta den sea un negacion di peticion of un anulacion di peticionnan.

Actualmente peticionnan mester ta completo na momento di entrega:

E cliente cu a procede – pa su motibonan – pa entrega un peticion cu ta incompleto, lo ripara cu DIMAS lo procede como lo siguiente: sea

  • Sin documento – lo e ricibi for di DIMAS un email di indole informativo, indicando e cu locual a ser manda ta incompleto y cu pa es motibo e no a ser tuma den tramite dor di DIMAS. E ta recomendabel pa e persona cumula tur documentonan necesario pa despues haci su cita di nobo pa asina e entrega di esaki na DIMAS.
  • Peticionnan incompleto – cu falta 1 of mas documento – lo wordo tuma den proceso pero lo procede pa haci e evaluacion di e peticion cu locual a ser entrega, locual ta significa cu e peticion lo resulta den un contesta probablemente negativo. (= negatieve beslissing). Esaki ta conta pa peticionnan cu falta por ehempel e documento positivo di DPL.

Na momento cu un cliente traha un afspraak y e (ainda) no tin tur documento pa entrega su peticion completo, e ta stroba su mesun proceso di cana su caminda, pero tambe e ta stroba un otro cliente di haya un cita, cu si tin tur su documentonan rekeri pa entrega un peticion completo.

DIMAS ta pidi su clientenan pa nan traha un cita via di e sistema di afspraak riba e website di DIMAS www.dimasaruba.aw unicamente na momento cu nan tin tur documento den nan poder cu ta necesario pa DIMAS por haci un debido evaluacion di e peticion.