Header image

DIMAS ta splica e meta y proceso di e vuelonan humanitario di Regreso Boluntario

Desde comienso di e pandemia di COVID19 ministerio di Husticia, Seguridad y Integracion, conhuntamente cu partners strategico a bin ta haci continuo esfuerso pa e programa di asistencia Regreso Boluntario.

Durante di e ultimo lunanan a logra vuelonan di repatricacion asisti pa diferente parti di mundo manera Europa via Hulanda, Republica Dominicana, Colombia, Ecuador, Peru, Argentina, Surinam y Guyana. Den luna di september a logra realiza dos vuelo pa Venezuela.

E meta di e programa di regreso Boluntario ta pa brinda asistencia na e stranheronan sea cu nan ta inmigrantenan cu un status legal of cu tin un status irregular y cu ta desea di regresa nan pais di origen di forma boluntario pa nan residencia nan mes. Esaki ta conta tambe pa e turistanan cu a yega Aruba prome cu e pandemia y a haya nan mes ta keda obligatoriamente Aruba pa via cu e fronteranan a cera.

Actualmente tin mas di 600 persona registra cu ta desea di regresa Venezuela y e lista ta sigui crese. Nos ta pidi tur interesadonan pa tene pasenshi y ta pendiente di nan telefon y emailadres. Percura pa e datonan ta skirbi di forma correcto den e formulario pa asina DIMAS por tuma contacto.

Asistencia

E asistencia cu pais Aruba ta brinda ta entre otro di duna informacion, haci registracion y inventarisacion di cuanto persona tin interesa den e programa y pa cua parti di mundo, mediacion riba nivel diplomatico cu e pais di origen y e asistencia logistico cu ta encera entre otro regel e aerolinea (cuanto vuelo, cuanto persona pa vuelo). Regreso Boluntario ta un programa di asistencia special pa esnan cu ta na Aruba y kier regresa nan pais di origen.

Nos ta pone un enfasis riba e parti humanitario mirando cu te ainda e fronteranan cu e paisnan ta cera y pa es motibo ey e persona no por book un vuelo comercial. Riba nivel diplomatico pais Aruba ta haci e mediacion pa asina e pais por ricibi su residentenan bek via di e vuelonan di Regreso Boluntario.

 Condicionnan pa cada biahero

E costonan mara na cada vuelo ta e gasto di e pasashi, airport tax y PCR test y ta core pa e biahero y tin di wordo paga na momento cu e wordo selecciona y e mes confirma cu e lo aborda un vuelo.

Contacto

E ta importante pa e persona interesa den repatriacion ta pendiente di su telefon y di su emailadres personal como cu esakinan ta e forma con DIMAS lo comunica cu nan pa cualkier informacion.

DIMAS ta conciente cu tin personanan cu no por cumpli cu a gastonan mara na e programa di Regreso Boluntario y ta informa e personanan cu:

  • Si tin un status legal por ehempel un permiso por pidi pa restitucion di e deposito na momento cu wordo selecciona pa e vuelo di Regreso Boluntario. DIMAS lo intermedia cu Departamento di Finansas pa asina por agilisa e procedura y por cubri e gastonan, e restante di e placa e biahero lo ricibi pa e por repatria.
  • Den caso cu e persona a yega Aruba riba invitacion di vacacion y pa cualkier motibo a keda Aruba. E gastonan di repatriacion ta core riba e garante, cu ta e persona cu a extende e invitacion pa e persona por bin Aruba for di den exterior.

Nos ta remarca cu ora un persona pidi un carta di invitacion pa un persona bay keda serca dje for di den exterior, ta e garante lo ta responsabel pa tur gastonan cu por surgi cu e persona cu a bin keda serca dje.

E retonan cu nos a encontra te na e momentonan aki:

  • Personanan no ta yena tur e datonan den e formulario.
  • Na momento cu DIMAS yama por ehempel pa asina completa e datonan of pa confirma e interes pa aborda un vuelo no ta haya comunicacion cu e persona.
  • Emailadres ta fout of no ta contesta bek.
  • Personanan no ta cumpli cu a gastonan di repatriacion.
  • Personanan no ta haci e test di COVID.
  • Personanan ta sali positivo na e test di COVID.
  • Despues di cumpli cu e gastonan y haci test, no ta presenta dia di e vuelo.

Regreso Aruba ta pa esnan residente na Aruba pega den exterior

Residentenan di Aruba pega den exterior cu ta desea di wordo considera pa un vuelo humanitario por inskribi unicamente via di e emailadres regresoaruba@crisis.aw y lo mester manda un copia di paspoort y permiso valido, hunto cu nan adres den exterior, adres di residencia na Aruba, telefon di contacto den exterior y di Aruba. Vuelonan di Regreso Aruba no ta wordo maneha door di DIMAS.

Registra pa siguiente vuelo di Regreso Boluntario for di Aruba pa exterior

Interesadonan por sigui registra via di e formulario online pa vuelonan humanitario cu ta sali for di Aruba, esnan cu a registra caba no ta necesario pa bolbe registra. Na momento cu DIMAS tin informacion concreto lo sigui comunica cu e personanan cu a registra via di nan emailadres personal. Pa mas informacion of pa inscribi pa e programa di repatriacion asisti di Regreso Boluntario for di Aruba por tuma contacto cu telefon 522-1500 of bishita e website di DIMAS www.dimasaruba.aw y klik riba e tab di Vrijwillige Terugkeer / Regreso Voluntario / Voluntary Return.