Header image

DIMAS ta splica proceso di peticion di permiso online

Prome cu e yegada di e Coronavirus DIMAS ya caba tabata den planificacion pa bay traha y ofrece servicionan digital. Esaki lo mester a sosode di forma gradual durante di 2020. Pero cu yegada di e Coronavirus na Aruba y e demanda grandi di comunidad pa entrega peticionnan di permisonan nobo y renovacion esaki a urgi nos como organisacion pa ofrece un solucion na tur esnan cu ya tabatin cita plania. Den un tempo record DIMAS a introduci e peticion online den forma di un e-form pa asina por auxilia e personanan cu por a haya nan mes afecta durante di e Shelter in place.

Durante di e periodo maart te cu awor nos ta ricibiendo hopi feedback constructivo di clientenan cu a hasi uzo di e formulario aki. E feedback ricibi nos ta evalua cada siman y di e forma aki nos a adapta e formulario y e comunicacion cu nos clientenan. Desde 4 di mei DIMAS ta full operacional brindando servicio di forma digital.

Clientenan di DIMAS cu mester entrega un peticion di permiso online por a hasi esaki caba for di maart door di sigui e siguiente simpel pasonan:

  1. Persona mester zorg pa e tin tur documentonan rekeri y scan nan den 1 solo PDF.
  2. Traha un cita riba nos website dimasaruba.aw
  3. Confirma e cita via di e emailadres cu a registra den systema di DIMAS.
  4. E persona lo ricibi un email cu e link di e e-form pa e hasi su peticion online riba e dia di su cita. Ta importante pa entrega e peticion riba e dia di su cita y no prome of despues.
  5. Na momento di yena e formulario online mester agrega e documentonan rekeri como 1 solo PDF file.
  6. E persona mester zorg pa su peticion ta completo. Pa cada peticion tin un checklist y personanan por haya esaki riba nos website dimasaruba.aw.
    1. Peticionnan incompleto lo ricibi un email di cancelacion.
    2. Peticionnan completo lo ricibi un orden di pago via di e emailadres registra durante di e peticion.

Ta importante pa e persona ta conciente cu:

  1. Mester yena un emailadres personal. DIMAS ta boga pa por tin contacto directo entre DIMAS y su clientenan y esaki lo sosode via di e emailadres cu e persona yena na momento di hasi su cita.
  2. Entrega peticionnan cu ta completo. Peticionnan incompleto lo wordo cancela na momento cu nos ricibi nan.
  3. Cumpli cu e orden di pago asina cu ricibi esaki den e termino stipula pa medio di:
    1. Online Billpayment di Aruba Bank of
    2. Online Billpayment di Banco di Caribe of
    3. Paga na un MFA hibando e orden di pago.

Den caso cu e cliente opta pa hasi e pago pa un servicio di DIMAS di un otro forma por ehempel transferencia bancario e lo mester tene na cuenta cu esaki lo core riba su mesun riesgo. DIMAS ta depende di e clearance system di Departamento di Impuesto y esaki lo por tuma aproximadamente 10 dia pa DIMAS por ricibi e matching si e cliente inclui e siguiente datonan:

  • Nomber y Fam di e cliente
  • Number di Barcode (PON nr./ Payment Order Number)
  • Number CRV
  • Suma correcto

Pa mas informacion por bishita e website di DIMAS www.dimasaruba.aw of por tuma contacto cu nos libremente via di nos e-Helpdesk. DIMAS lo sigui brinda informacion na comunidad y ta habri pa ricibi feedback pa di e forma aki por brinda servicio cu ta “match” e necesidad di e clientela.