Header image

Venezuela no ta aproba vuelonan di repatriacion for di Aruba pa falta di capacidad pa atende cu COVID19

Ministerio di Husticia, Seguridad y Integracion, a tuma nota cu tin hopi inkietud alrededor di e programa di asistencia di Regreso Voluntario.

Desde comienso di e crisis di COVID19 te cu awor a efectua 2 buelo cu exito di e programa di repatriacion asisti. Cu e prome vuelo a repatria 15 persona pa Republica Dominicana y cu e di dos vuelo cu a tuma lugar e weekend cu a pasa a repatria 35 pa Argentina.

Pa e weekend di 8,9, 10 y 11 di mei ultimo tabatin 10 vuelo plania tentativamente pa Venezuela. Lamentablemente e vuelonan aki no por a tuma lugar debi cu autoridadnan Venezolano te na ultimo ora no a tuma e desicion di duna autorisacion  y sin autorisacion e vuelonan aki no por despega for di Aruba.

Gobierno di Aruba ta compronde e situacion dificil cu e personanan aki ta pasando aden, cu nan ta desea di regresa nan pais bek lo mas pronto posibel. Mientrastanto awe a drenta comunicacion oficial cu por lo pronto e autoridad Venezolano no ta aproba pa su residentenan bolbe Venezuela, pa motibo di falta di capacidad pa atende cu e medidanan di prevencion di COVID19. Asina cu bin un cambio na e situacion, lo reanuda e esfuersonan pa concretisa e vuelonan di repatriacion.

E asistencia cu pais Aruba ta bin ta brinda desde comienso di e programa Regreso Boluntario ta entre otro di duna informacion, hasi registracion y inventarisacion di cuanto persona tin interesa den e programa y pa cua parti di mundo, mediacion cu e pais di origen y e asistencia logistico cu ta encera entre otro regel e aerolinea (cuanto vuelo, cuanto persona pa vuelo).

Locual ta trata e costonan di e ticket di repatriacion pa Venezuela nos por informa cu pais Aruba a yega na acuerdo cu e aerolinea Albatros y pa efectua e vuelonan esaki lo costa 509 florin pa persona. Si e persona cu a registra pa e programa di regreso boluntario a ser cancela caba e suma aki, lo percura pa e haya un voucher pa e uza ora cu e vuelonan di repatriacion por ser concretisa.

E ta importante pa e persona interesa den repatriacion ta pendiente di su telefon y di su emailadres como cu esakinan ta e forma con DIMAS lo comunica cu nan pa cualkier informacion.